墨西哥是北美 ? 中美 ? 點解有咁多問題 ?? (包行程路線 ) ( Home : Itinerary information)

去墨西哥是一個偶然, 因為今年暑假去加拿大探親, 加上好朋友計劃差不多時候在美國結婚, 本來計劃到加東的旅行, 跟朋友傾得好興奮話不如一齊去墨西哥, 就開始睇資料, 發覺原來好多野睇, 比加東更有趣, 又一班朋友, 都相當不錯 !

最後, 一班朋友都有各樣原因無法一齊, 我地兩老繼續墨西哥之旅!

出發前有很多美麗的誤會, 包括 :

1. 墨西哥是北美 ? 中美 ?
最多人跟我講 " 哇去中美 (甚至南美), 其實墨西哥好長, 墨西哥城位處北緯 19 度 ( 香港大約22 度), 再南下都只係 12-13 度, 所以其實唔係好近赤道.  不過有呢個誤會好正常, 墨西哥部份位置連接 瓜地馬拉,貝里斯, 又有馬雅文明, 所以有些國家會將墨西哥西南部洲包入中美.
* 不過正式計係唔包, 如果唔係墨西哥點會跟美國簽NAFTA ( 北美自由貿易協議)

2. 墨西哥好危險, 點解要去?
墨西哥真係好大, 其實今次去大部份的地方都好安全, 自由行無問題, 除了墨西哥城好多警察 ( 可能多賊啦), 大城市就自然多賊啦 ! 有些北美朋友好擔心因為佢地成日睇新聞好多話綁架，搶劫，這些主要集中北邊近美國邊境, 所以, 都係一句, 就算去意大利, 法國都好多小偷搶劫, 自己小心點, 打醒精神!

3. 墨西哥人好熱情 ?
出發前睇過其他人的遊記, 好多都話墨西哥人好熱情, 好肯幫人, 有問題你未問已經好主動幫你 ! 我地由 Cancun 出發, 一路玩, 都唔覺得墨西哥人好helpful, 甚至我地試過同團的墨西哥人, 明明識講流利英文都要跟我地講西班牙文 ( 直到我地真係無法溝通才講英文), 通常幫我地的人係其他國家的遊客 ! 哈哈!!

後來, 我睇一些講解墨西哥的書, 解釋墨西哥人是比較內向, 不容易表現自己, 直到跟你比較相熟, 咁我就明白啦! 係墨西哥, 你唔會比人眼望望, 唔會有人搵你映相 ( 相比, 南美及土耳其, 明顯無人會搵我地映相)

4. 墨西哥文明只有馬雅 ?
自從2012 年世界末日, 馬雅好 hot ! 當然 2012 年沒有末日, 但馬雅的數學及天文知識是十分 advanced. 但, 墨西哥文明 不只有 馬雅, 今日在墨西哥城附近的Teotihuacan (特奧蒂瓦坎), 其金字塔,亡者之路, 已在二千年前有成熟建築,  還有 Oaxaca 的  Zapotecs & Mixtecs, 不單建築, 亦有很完善的文字. 下篇將會略略解釋 不同墨西哥文明.

如果想知道多D 歷史, 就快D 睇你吓 墨西哥歷史及中美洲文明簡介 !

行程路線
Day 1-3  :      加勒比海的陽光與海灘 ( Playa Del Carmen, Isla Cozumel, Coba, Tulum)

Day 4 :         新世界七大奇蹟 (Valladolid,Chichen Itza)

Day 5-7 :      美麗的美麗達(Merida, Uxmal)

Day 8-9 :      遊歷輝煌的馬雅 (Maya )年代 ( Palenque, Bonampak; Yaxchilan)

Day 10-11 :   了解原住民天主教的另一面 (San Cristobal de las casas )

Day 12- 15 :  墨西哥 Zapotec 及 Mixtec 文明之地 ( Oaxaca)

Day 16 - 17 : 最後的一個文明 - Aztecs 及 Teotihuacan (Mexico City : Part 1 )

Day 18 -19 :  我以為自已去左西班牙 ( Guanajuato)

Day 19-21 :   一切以博物館作終結(Mexico City : Part 2 )

回家後, 一路都提不興致去寫這遊記, 墨西哥是否一個必去地方嗎 ? 我又唔覺得, 相信跟不太歡喜當地的食物 (辣) 有關, 但如果想去的朋友, 請早點年紀去吧! 因為有許多金字塔要爬, 夏天天氣好熱, 如果到七老八十才去, 就會喪失很多(臭汗)味道!

最後, 希望這遊記不單可給計劃去墨西哥朋友的資料, 還可給對墨西哥文明歷史有興趣的朋友一些額外的信息 

Next